Labaw Sa Tanan

Sa Akong Inahan

Sugod sa sinugdanan

Kami imo nang' giatiman.

Sa among' kadaghan

Gialima mi nimo tanan.

Pirmi ka man maguol

Kami wa' 'mo gibasol.

Dugang man mi sa kahasol

Kanamo wa ka mapuol.

Sa panahon sa kalisod

Bisan hapit di' na ka kasugakod

Wa gayod ka magpaanod

Sa bisan unsa nga balod.

Sa magul-anon ko nga adlaw

Sa akong kiliran andam kang' maminaw.

Nagluha kong' mata imong gipatin-aw.

Imong kamaayo mangibabaw.

Inahan namong' mapinanggaon

Kami gayod mapasalamaton.

Malipayon mo kaming' giangkon.

Labaw pa ka sa bituon.

Gihigugma kong' inahan

Hingpit mo untang' timan-an

Nga para nako ug sa tibuok kalibotan

Labaw ka sa tanan.

Sa Akong Amahan

Sa pipila ka tuig

Gipundok mo ang atong bulig.

Kanimo dako kaayo ko'g pagsalig

Tungod kay klaro pa ka sa tubig.

Labawng' taas mong' pasensya

Ug maanyag mong' presensya

Nagpabiling' maayong grasya

Sa tibuok pamilya.

Sa daghang' butang ikaw nagdumili

Nagpaila nga kami kanimo bahandi.

Sa tanang' butang kami wa' 'mo pasagdi.

Wala gayo'y kanimo makapuli.

Sa mga maayong pamatasan

Kami imong' gitudloan.

Matinuoron kang' kauban

Labaw pa ka sa bulawan.

Amahan namong gitahoran

Imong' kakugi dili matupngan.

Nagpasalamat 'mi nimo sa tanan

Kay kami wa' nimo gipasagdan.

Pinangga kong' amahan

Hingpit 'mo untang' timan-an

Nga para nako ug sa tibuok kalibotan

Labaw ka sa tanan.

Sa Akong Ginikanan

Mapasalamaton kami og dako

Sa tanan ninyo nga kahago

Sukad pa niadtong kami nagkalago

Hangtod kami tanan nangadagko.

Kamo gayod tinuod nga isog

Kay sa kinabuhi kamo nakigbasog.

Hinaot tagaan pa kamo og saktong kusog

Tungod kay para kanamo nagpabilin mong' baskog.

Inyong disiplina sakto ang paagi

Tungod ninyo sa saktong dalan ko nag-agi.

Tungod sa inyong tumang' pagkugi

Nindot tanan nakong' kaagi.

Sa akong wa'y samang' ginikanan

Salamat sa di' matupngan nga pag-atiman

Kamo unta padayon nga gasahan

Sa atong Ginoo sa Kalangitan.

Tinahod kong' ginikanan

Hingpit n'yo untang timan-an

Nga para nako ug sa tibuok kalibotan

Labaw mo sa tanan.

LABAW SA TANAN By Rhey Anne Gempisao Alvarico